節目【月曜から夜ふかし】早前訪問喺日本生活嘅外國人，有位哥哥仔講出咗好多香港學生都遇到嘅問題：「現實同教科書嘅日文完全唔同」。
成日有人話學咗日文好多年，N1又合格埋，但總係難以開口講日文，或者聽唔明日本人講緊咩。呢個現象其實唔單止係日文，其實學任何外語時都會出現，皆因太過依賴書本。
教科書教嘅都唔啱？！當然唔會，亦冇資格話佢唔啱，但書本始終有局限性，篇幅有限，都係基於一定嘅文法範圍以及例文內容，將基本嘅教俾學生，一旦去到實際生活應用時，就明顯出現落差。呢一點亦係希実唔用書，自己做教材嘅原因。
先唔計文法，日常使用嘅日文的確有好多困擾學生嘅地方，例如：各種口語縮略及變音、名詞嘅略語、新出現嘅流行語、方言等等。呢啲教科書冇可能包括喺入面，但偏偏日常生活中就經常出現，所以除咗多接觸之外，別無他法。
因此當學生去到一定程度以後，一定要多啲睇日本電視節目、日本人拍嘅Youtube、寫嘅Blog之類，嗰啲先係貼近生活嘅日文。
資料出處：月曜から夜ふかし