好多人趁復活節假期去日本玩，同學仔返嚟分享趣聞同靚相（當然我哋最關心嘅係佢哋有冇多啲開口講日文），有人去咗遊覽琵琶湖（びわこ），俾佢嘅巨大嚇親，以為去咗個海。
琵琶湖位於滋賀縣（しがけん），係日本最大嘅湖泊，佔咗縣嘅六分之一面積，比半個香港仲要大，如果企喺湖最闊嘅位睇，真係望唔清對面岸。不過佢有個窄窄嘅湖頸位，以琵琶湖大橋（約1.4km）連接湖嘅東西岸，上面可以俾行人同單車通行，有時間嘅話嚟一個環湖單車遊都唔錯（南湖一周大約50km，一日遊OK）。
有樣幾得意嘅嘢，喺日本法律定義上琵琶湖其實係河，係屬於「淀川水系」嘅河川，名稱係「一級河川琵琶湖」。
原因係有100條以上嘅一級河川流入琵琶湖之後，水會再經由淀川、宇治川、瀬田川等河流向大阪灣流出去，咁樣諗嘅話，琵琶湖就係呢啲河流嘅一部分喇。
資料出處：
jalan
wikipedia