2月13日係「苗字制定記念日」。苗字（みょうじ）即係我哋而家所講嘅姓氏，古代日本姓氏係天皇所賜，只有少數嘅貴族、武士可以用，平民只係得個名。
1875年嘅今日，明治政府頒佈「平民苗字必称義務令」，目的主要係為咗徵兵徵稅、做戶籍等，規定所有日本人必須使用姓氏，本身冇嘅唔該你自己作一個。咁多年嚟都慣咗唔用姓㗎啦，所以平民本來都唔多熱衷，不過政令落到嚟冇辦法，求求其其都要改返個。
因此，日本人嘅苗字五花百門，除咗本身自祖輩流傳落嚟嘅姓氏，有啲係源於居住地地名（例：伊東、千葉），有啲就源自地形、風景（好多苗字都有「山」、「川」、「田」等字），總之就多不勝數，有興趣嘅不妨研究吓。
據統計，全國最多嘅姓氏頭三位分別係「佐藤」、「鈴木」同「高橋」，而「田中」就排第四，有冇留意到呢啲苗字經常都出現喺教科書同考試嘅例句呢？
如果俾你自己揀，你又會揀個點樣嘅姓氏呢？
資料出處：
https://myoji-yurai.net/prefectureRanking.htm
https://friday.kodansha.co.jp/article/197303