今年嘅節分係2月3日。
所謂「節分（せつぶん）」，本來恰如其名係指季節嘅分界，一年就有四次，訂喺每個季節開始（立春、立夏、立秋、立冬）嘅前一日。識啲風水命理嘅人都知道，立春先係一年嘅開始（而唔係正月初一），所以立春前嘅節分，其實就等於大除夕，因此特別受到重視。而家提起節分，一般都係指呢個。
準備過年當然要祈求新年順風順水，趕走舊年嘅衰氣。古代中國喺節分就有一項驅除病魔惡鬼嘅儀式，喺節令變換之日舉行，叫做「追儺（ついな）」。「鬼」其實只係一切疫病、災難不幸嘅象徵，藉著驅鬼嚟祈求新一年幸福美滿。
後來呢個儀式傳去日本，並逐漸演變，成為而家日本節分嘅各種習俗。為人熟悉嘅有撒豆驅魔、食惠方卷等等。同時，季節交替期間氣溫同天氣不穩定，人好容易病，藉著舉行儀式順帶提醒人人注意健康管理，亦係背後嘅原因之一。
【豆まき（まめまき）】
年年都有人講點樣「豆まき（撒豆）」，不如講吓啲唔同㗎啦。其實日本唔同地方嘅做法同習慣都會有啲分別。
每逢節分，超級市場等地方就會有一包包「福豆（ふくまめ）」賣【會用「炒り豆（いりまめ）」（炒過嘅豆）。因為生嘅豆會發芽，感覺啲衰嘢會再度萌芽咁，唔吉利】，仲附送鬼面具（有啲係醜女面具），等而家啲人買返去叫老豆戴住扮鬼。不過本來嘅習俗應該係由作為一家之主嘅老豆（或者本命年男女），負責做家庭代表撒豆驅鬼嘅。
喺北海道、東北、九州等某啲地方，會改為撒花生、朱古力等。特別係北方冬天積雪深，撒豆後要清理好麻煩，花生比大豆大粒，就算落喺雪地都容易搵到。有啲人就從衛生層面嚟睇，花生有殼，朱古力就有獨立包裝，覺得乾淨啲。
成日有人話撒豆嗰陣要一邊嗌「鬼は外、福は内」（鬼在外、福在內），其實有啲地方會嗌「福は内、鬼も内」（福在內、鬼都在內）。例如有啲神社本身係以鬼作為祭神或神嘅使者，就會改叫「鬼も内（鬼は内）」。又有啲日本姓氏好似「鬼塚」、「鬼頭」等（係呀，有人將個鬼字用嚟做姓㗎，我隨口都噏得出個叫鬼頭桃菜啦。邊位？自己google吓啦😏），佢哋都會改嗌「鬼も内（鬼は内）」。