由JAXA【宇宙航空研究開発機構】（うちゅうこうくうけんきゅうかいはつきこう） 同三菱重工業（みつびしじゅうこうぎょう）聯合開發嘅H3火箭（H3ロケット）尋日首度發射升空，可惜第二節引擎點火失敗，JAXA唯有發出自毀指令，任務失敗告終。
雖然人類探索太空經歷幾十年，甚至已經登月，但發射火箭依然係一項充滿挑戰嘅尖端科技。無數零件再加上遙距控制，是但一部分出錯都唔會成功。
諗起以前一套由小說改編，叫《下町火箭》嘅日劇，劇情緊湊，推薦大家搵返嚟睇吓。故事講述大企業「帝國重工」為咗發射火箭，開發旗下新型引擎，但其中一個關鍵零件嘅專利權被一間細規模嘅工廠「佃製作所」所擁有。本來打算高價買個專利權返嚟，但「佃製作所」唔同意，而提出要供應自家生產嘅零件，一齊參與火箭計劃。
「帝國重工」嘅工程人員當然睇唔上眼，認為呢啲工廠仔冇能力生產高技術產品，諸多留難。後來實驗結果證明，「佃製作所」生產嘅零件，不但技術合格，而且比「帝國重工」所造嘅更加好。
世界上冇嘢可以自己叻哂，學識同人合作，先容易成功。另外，唔好睇小自己所做嘅事，任何微小嘅事都有價值，就算一格廁紙一條底褲都有佢嘅用途，認真做，做到極致，太空都有得你上。
失敗唔緊要，汲取經驗搵出錯處，希望H3下次順利升空。
資料出處：
https://www.youtube.com/watch?v=L_08UxnR9YQ
http://www.tbs.co.jp/shitamachi_rocket/2015/