喺台灣嘅圖書館見到一本教日文嘅刊物，題材廣泛而輕鬆，覺得好有趣。台灣社會對日文有興趣嘅人應該唔少，如果唔係點能夠支持以雜誌月刊嘅方式出版呢？
畢竟台灣曾經有過日治時期，生活上好多地方或多或少都受到日本嘅影響。反觀，好難想像而家嘅香港能夠出現呢類型嘅書刊，以及積極嘅語言學習風氣。莫講話日文，英文、甚至廣東話都遲早守唔住。
語言同一個地方嘅文化密不可分，能夠理解一個語言，就能夠更好咁理解一個地方嘅文化底蘊同生活習慣，眼界廣闊咗，人就唔會咁自以為是。
學好母語，係延續同守護自己嘅文化。學好外語，你睇到嘅世界會大咗好多，從而知道天外有天，學識謙卑；但同時亦能夠知道更多一個地方必定有好有壞，唔使盲目崇拜。