尋日執屋搵到當年陪我學日文嘅戰友【CASIO EX-word】電子辞書（でんしじしょ），型號即使喺當年亦只係基本版，黑白液晶Mon，當然冇touch screen同手寫輸入功能，但對當時嘅我嚟講已經相當有用，如獲至寶。
以前雖然有得上網，但網上學習日語嘅資源都十分有限，網速又慢，而且對好多初學者嚟講，佢哋係查都未識得點查，要點搵都唔知。嗰陣時online又免費嘅日中字典我印象中係冇嘅（或者有我搵唔到啦），因此有一部字典機真係十分之方便，見到唔識嘅生字即查即學即記！
一直都唔想用old seafood嘅語氣同學生講嘢，但喺呢個話題都經常忍唔住廢老上身：「你哋而家學日文真係比以前幸福好多㗎喇」
手機有大量字典App、日語學習App可以裝，有埋發音，初學者就算唔熟悉打日文字都可以用手寫輸入，只要你肯查就唔會搵唔到。YouTube等又有大量日文channel可以練習聽力，接觸日語嘅渠道比當年真係多咗好多。
不過或者就係太方便喇，有啲人就唔識得珍惜，覺得唾手可得嘅嘢，就唔會好好利用。生字唔識呀，咪即刻開App查囉，不過查完就算，唔會記咗學咗個生字，永遠金魚記憶，過目即忘。生字又唔記，文法又唔記，練習又唔做…（抱怨mode on）
得閒諗返吓自己點解要學日文啦。如果只係為咗去日本食買玩，學英文同普通話得㗎喇。