自古以來日本人都會喺唔同季節嘅節日舉行感謝神明、供奉食物等儀式，其中就有一啲特別日子係為咗祈求細路仔健康平安快高長大嘅，例如3月3日就係祝福女孩子成長嘅日子，叫做「雛祭り（ひなまつり）」。
日本人相信神明靈體等會依附喺一啲物件上面，「人形（にんぎょう）」（即係公仔）就係其中一種依附物。古時啲人會整個公仔出嚟，等啲污糟嘢呀災禍等等依附哂去個公仔度（即係搵件嘢俾啲衰嘢上身，作為代罪羔羊咁幫人頂咗佢），之後就放哂啲公仔去河或者海沖走，送走啲衰氣。
最初呢啲公仔好鬼簡陋，求其搵啲紙剪個人形出嚟就算。後來貴族間想保祐幼兒免於災難，開始整啲似樣啲嘅公仔。
另一方面，以前貴族嘅細路女會玩吓同啲公仔扮靚嘅遊戲，叫做「ひいな遊び（ひいなあそび）」（即係好似玩Barbie咁）。起初只係遊玩性質，不過既然係上流階層嘅玩意，啲公仔自然做得靚好多，模仿哂宮廷嘅裝著造型。
呢啲高雅嘅公仔玩意後來仲作為嫁妝，隨住貴族女仔同武士門第通婚而逐漸流傳起嚟。「吸衰氣功能」同「barbie功能」慢慢結合起嚟，就形成咗現時「雛祭り」擺放「ひな人形」嘅習俗喇。
早前去過日本國際交流基金會籌辦嘅「日本人形展」，就有展出一套七層嘅「ひな人形」，十分精緻，分享俾大家睇吓丫。