蚊、曱甴、蚤乸之類嘅昆蟲，相信多數人都覺得討厭甚至怕咗佢哋。你又有冇諗過呢啲昆蟲竟然會俾人放喺寺廟供奉呢？
供奉佢哋嘅竟然仲係一間叫「アース製薬」嘅殺蟲驅蟲用品生產商，係咪有啲匪夷所思？
據講呢間公司大約40年前開始「虫供養（むしくよう）」，係基於佢哋尊重生命，同埋要實現與地球共生嘅經營理念。為咗令員工感受到生命嘅珍貴，最好就係俾佢哋參加一年一度嘅「虫供養」。同供養人類先人嘅儀式冇分別，一樣會燒香誦經，仲有哂遺照同住持說法。（雖然好多員工最初都覺得成件事十分超現實同格格不入）
的確，昆蟲係好多嚴重傳染病嘅媒介，為人類帶嚟疾病同死亡，於是人類就發明各種殺蟲藥對付佢哋。要測試藥效，就需要用大量昆蟲嚟做實驗。但諗深一層，為做實驗而犧牲性命嘅昆蟲，並唔係咬你或者播毒嗰隻，而只係為人類嘅研究貢獻，簡單嚟講，佢哋係無辜㗎，所以要藉住虫供養，對呢班為咗人類奉獻咗生命嘅昆蟲表達感謝。
「虫供養」其實古代日本就有，農夫耕作時有時逼不得已會殺咗好多昆蟲，所以大約每年十月十號左右都會請僧人嚟祭祀供奉佢哋。
一條人命同一條蟲命，本無高低輕重之分，亦無你我之分。南無阿弥陀仏（なむあみだぶつ）
資料出處：
https://www.oricon.co.jp/special/62398/