無論有冇拖拍，香港男士應該每年都為準備情人節而頭痛（溝到或溝緊嘅要買花買禮物，毒L要匿喺屋企加詛咒），相信佢哋都會想過吓日本嘅情人節。
日本嘅情人節「バレンタインデー」與別不同，發展出佢獨有嘅習俗，基本上當日係女生送禮俾男生，而且幾乎都係送朱古力。點解會喺咁呢？雖然起源有幾種講法，但都係同一樣嘢：【商家促銷手法】。
為咗刺激銷量，朱古力生產商同百貨公司都力推「喺情人節送朱古力俾你愛嘅人啦」之類嘅廣告宣傳，以前文化上嚟講日本男性唔係好興送禮俾女性，因此將宣傳標語改成「由女生送俾男生」，就慢慢流行起嚟。
女生送俾心儀男生嘅朱古力叫「本命チョコ（ほんめいチョコ）」，本身都算係一個表白行動，適合喺情人節做嘅。
但商家又點會放過其他促銷機會，漸漸就叫你送埋俾其他人，發展出「義理チョコ（ぎりチョコ）」（你唔係我杯茶，朋友嚟咋但都請你食啦）、「友チョコ（ともチョコ）」（同性間【主要女性】互相贈與）、「逆チョコ（ぎゃくチョコ）」（調返轉由男生送俾女生）、「自己チョコ（じこチョコ）」（自己買俾自己食）等等，總之情人節你就同我買朱古力啦！
不過近年都有不少人反對情人節送朱古力呢個行為（當然多數係毒L），聲稱呢啲只係商家嘅陰謀。而對於「義理チョコ」，的確有唔少比較年長嘅男性表示唔想收，因為之後要花錢回禮。亦有女性表示「義理チョコ」會帶來很大的金錢負擔，社會風氣人人都送，搞到唔送又唔得，應當廢止。就連Godiva Japan嘅社長都曾經喺2018年於報章表示日本應該放棄「義理チョコ」呢種義務性形式性嘅習慣。
送花又好，送朱古力又好，心意先係最緊要嘅。無論送禮嘅定收禮嘅，記住唔好當一切都係理所當然呀。
#這些機會不是屬於我的
#我覺得自己係零
資料出處：
https://ja.wikipedia.org/....../%E3%83%90%E3%83%AC%E3......
https://hd.stheadline.com/news/realtime/hk/2045910/
https://girlsnews.tv/actress/408697